米米家族 米雪国际影迷网 Michelle Yim Clan

 找回密码
 注册 Register
搜索
查看: 374|回复: 1

[雪梨] 20190507【母親節專訪】雪梨:無悔17歲做單親媽媽

[复制链接]
发表于 2019-5-10 01:04:10 | 显示全部楼层 |阅读模式
本帖最后由 小雯雯 于 2019-5-10 01:39 编辑






一年一度母親節將至,每個家庭對母親節的定義都不一樣,大多數是子女報答媽媽養育之恩的日子,送禮物、獻花、寫卡片、請食飯之類,但對於擁有一子一女的雪梨而言,今個母親節身為媽媽的她卻選擇透過《晴報》的專訪向女兒表達心底話,過往因工作而跟子女分隔兩地,令女兒缺乏母愛,她也深感歉疚。眼前的徐頴堃(Erica)是雪梨的幼女,今年31歲亭亭玉立,長得標致可愛,而且談吐大方,除了接幕前的工作外,也是一位教小朋友英文的老師,而哥哥徐偉棟則36歲,主要投放時間在內地拍戲當演員,過往他們沒有被「單親小朋友」、「星二代」等標籤影響,反而獨立成長,成就現時的他們。




Erica同媽媽自細分開生活,但兩母女感情未有變質。(《晴報》圖片)




Erica提到媽媽開車載她返學,結果遲大到被罰企的事,小小點滴已經成為兩母女之間難忘的回憶。(《晴報》圖片)


雪梨16歲年紀輕輕入行,星途一片光明,不過1983年只是17歲時因拍攝電影《養鬼》而戀上徐少強,同年未婚懷孕,才得悉對方原來早已有家室,背負第三者之名,她卻未有理會姐姐米雪的反對,堅持誕下大仔徐偉棟,87年再生Erica,後來兩人分開,雪梨無名無分跟了徐少強七年。當年做單親媽媽不容易,一方面受到歧視,另一方面又要工作養活一對仔女,變相她沒辦法親身陪伴他們成長。雪梨說:「我同哥哥相處時間多啲,因為妹妹出世後冇耐,我就要復出工作養他們,我記得有次幫仲係嬰兒嘅妹妹沖涼時,不小心將她跌落水,實在很慚愧,對唔住阿女,我下次會小心啲。」她特別介紹兩兄妹睇日本卡通《再見螢火蟲》,希望他們可以像戲入面兄妹一樣互相相愛和照顧。




雪梨年紀輕輕誕下一對仔女,故一家三口相處都感覺似朋友。(網上圖片)

Erica直言跟哥哥兩人在加拿大生活,相依為命,由雪梨的姐姐「肥姨」照顧起居飲食,由於肥姨比較嚴厲,她曾經在小學時問過:「點解個個小朋友都有爸爸、媽媽接放學?點解我冇?肥姨冇講太多,只係話我大個就明白。慢慢知道其實身邊好多小朋友一樣有家庭問題,反而學識去感恩自己所擁有,而唔係去埋怨自己冇嘅嘢。」雪梨表示拍攝完《95神鵰俠侶》後,火速返加拿大探望小朋友,可惜已經變得生疏,她說:「當時見到個女直情係驚,因為個女完全唔知我係媽咪,我拖佢手都唔畀我拖,只係要拖我姐姐隻手,咁我惟有陪佢玩雪、講故事、玩遊戲,慢慢建立返個母女關係,對唔住,我真係畀唔到母愛佢,我唔怪佢對我生疏,因為係我問題,所以要搵辦法去彌補返個關係。」Erica直言體諒媽媽要努力工作,雖然不能夠陪伴成長,但好的方面就是讓他們兩兄妹學會獨立照顧自己。她笑言:「媽咪有帶過我返學,其實我學校好近屋企,過條馬路就到,但有日媽媽母愛大發要開車送我返學,結果兜咗一大個圈,搞到我遲到,被老師罰企15分鐘,諗返真係一個好好笑嘅回憶。」




雖然很早就安排一對仔女移民加國,但只要有時間,雪梨都會返加拿大探望他們。(網上圖片)




妹妹Erica曾經因為生疏,不敢拖媽咪的手,反而攬實照顧她長大的姨姨(右)。(網上圖片)

子女成長時失去母愛,但雪梨無悔做單親媽媽,她說:「我冇後悔,當時做單親媽媽年紀好細,我覺得自己仲有將來,所以我決定攬住一對仔女去生活,去過每個難關。其實好多謝一對仔女畀鼓勵我,佢哋好乖、好用心,我成日都話讀唔讀到書唔緊要,最重要做個好人。香港好多小朋友為迎合家長要求都變得好痛苦,所以我決定移民加拿大,佢兩兄妹讀到書就讀,讀唔到就工作, 買車就努力工作供車。我冇後悔做單親媽媽,雖然決擇係我自己決定,但我信仔女會明白,因為佢哋個性同我一樣咁倔強。」雪梨見到仔女長大成人,大感欣慰,她形容跟子女相處就好似朋友一樣,囝囝接戲會跟她商量,囡囡又會分享養兔仔、做狗義工的生活,她說:「容許我讚吓我一對仔女,我成日同佢哋講要自己捱出嚟的事情,先會覺得驕傲,而唔係伸大手板問家人拎錢。其實我係向佢兩個學,佢哋青出於藍好欣慰,我見過徐小明,亦見過好多前輩朋友,個個都讚我仔女,真係好多謝大家。」




長大後,一對仔女都非常體諒當初媽媽為他們奔波工作的辛勞,經常相約食飯聚會。(網上圖片)





媽媽主演舞台劇,一對仔女點都要支持。(圖片:受訪者提供)


在單親家庭成長,一直缺乏媽媽的照顧,但Erica從來沒有負面思想,她說:「冇負面想法,反而好想擁有個家庭。細個唔算係一個完整家庭成長,我係會憧憬自己將來家庭係點。我暫時未有拍拖,不過 唔心急,隨緣啦。」身旁的媽媽即時好緊張追問Erica,但身為過來人的雪梨說:「拍拖慢慢了解吓先,談吓戀愛,之後先談婚論嫁,唔好好似我咁一見鐘情......當然,一見鍾情都有個美好回憶,我唔係覺得係壞事,只係我感覺自己失去戀愛個過程,可以同另一半拍拖、睇戲、食飯咁。 如果你同我一樣命運係一見鐘情的話,我都開心,只要你鍾意就得。」問到Erica將來會成為一個怎樣的媽媽呢?雪梨說:「我相信佢係愛惜小朋友但唔會縱容嘅媽媽,因為佢本身有個囡囡,一隻小白兔叫WHITE SPOT,好疼惜佢,何況係一個小BB呢?但我絕對係唔負責任婆婆,因為佢哋自己有能力照顧,我只會從旁協助,提醒佢哋唔可以溺愛,因為溺愛只會害咗下一代。」母親節將至,Erica主動跟媽媽邀約,希望同哥哥一齊一家三口食飯慶祝,氹得雪梨非常開心。




雪梨很努力去修補母女之間的關係。(圖片:雪梨微博)




見面少不要緊,最重要是心連在一起。(《晴報》圖片)

場地提供:寬巷子 Quan Alley HK

https://skypost.ulifestyle.com.hk/article/2343857/【母親節專訪】雪梨:無悔17歲做單親媽媽%20「對唔住畀唔到母愛仔女」

本帖子中包含更多资源

您需要 登录 才可以下载或查看,没有帐号?注册 Register

x
 楼主| 发表于 2019-5-11 03:18:10 | 显示全部楼层
本帖最后由 小雯雯 于 2019-5-11 06:49 编辑

經典電視女演員雪梨在1995年播出的劇集《神鵰俠侶》中,飾演冷豔的李莫愁,雖然往後再有拍過5個不同版本的《神鵰》,但網民心目中最具代表性的依然是雪梨。而雪梨跟這個角色不可劃分,連微博賬號名稱都是「雪梨Sidney_李莫愁」,而且好多內地粉絲為她將舊有的劇集和照片修復,非常有心支持偶像。雪梨說:「由於大陸現在全國重播95年的《神鵰俠侶》,而年初有個電視台嘅節目又邀請我上去再演李莫愁,所以大家都討論。去年到山東拍戲,好多粉絲嚟探我班,佢哋話我知原來我在亞視年代儲落成20幾萬粉絲,而無綫劇集嘅支持者都有好多,佢哋成日話咁多個『李莫愁』之中,我係最深入民心,我實在唔敢誇獎自己,但佢哋咁講,對我嚟講係一份極大嘅禮物。」




雪梨面對感情非常灑脫,不能見光的寧願不要。(《晴報》圖片)




雪梨演的李莫愁,絕對是不朽經典。(網上截圖)




劇中冷豔無比的個性,未知跟本人的性格是否一樣?(網上截圖)

54
都係姐姐好,我就托賴個樣都冇乜點變。其實個仔有勸我戒煙,不過食咗咁多年真係好難,惟有食少啲,再慢慢愈食愈少。」身旁的囡囡徐頴堃(Erica)一臉從容,她認為媽媽是成年人,不能夠迫她,反而似足一個任性的小朋友,雪梨笑言:「學做個小朋友天真活潑又好,當係老人家睇化自己唔舒服嘅事又好啦!我個性唔識得嬲人,人哋對我唔好,可能自己做得唔好,唔嬲人連皺紋都少啲啦!」




雪梨和姐姐米雪都在演藝圈各自打拼。(東星圖片)

雪梨表示兩個仔女都有在內地發展,她希望將來有機會一家三口可以合作拍同一個戲,更點名想囡囡演壞女孩,挑戰一下演技。Erica說:「好難,上年接一套大陸古裝劇演奸皇后,真係好難,可能同自己性格反差好大,特別個氣場最難,我要睇媽咪同米雪阿姨嘅戲偷師。」雪梨從來沒阻止大仔徐偉棟同細女Erica入行做演員,只要不走歪路就可以,她說:「呢一行係辛苦,但佢哋唔入行又唔知辛苦,畀佢哋體會一下。我唔係嚴厲家長,多數用朋友方式同仔女溝通。初初試過用錯方法,太惡對個仔,後來先學識去溝通同愛護他們,糾正自己要做個好媽咪,我成日同佢哋講,最緊要顧好自己,我既然自己有能力,就唔使麻煩佢哋照顧返我。」




Erica自知個性太怕醜,主動做兼職接觸社會不同的人「壯膽」。(《晴報》圖片)

Erica自知由細到大都比較怕醜,所以一路讀書,一路做兼職,希望接觸社會上不同的人,挑戰自己弱點,直至入行後,個性不夠進取亦成為絆腳石,她說:「我覺得自己比較慢熱,不過每次有工作邀約,我都好珍惜同盡力去做好佢,家人教導我要有禮貌,我全部都會做足,當人家睇到你表現,就會記得你,同埋繼續搵你合作。」Erica稱跟爸爸在內地合作過好多次,絕對不會抗拒,雪梨說:「無論是我或者他們爸爸帶出來一齊工作,都係一種欣慰,我好錫佢兩兄妹,而佢亦好有體恤子女嘅心。我同徐少強唔再一齊,但再見亦是朋友,你問我嬲唔嬲,冇嬲就假嘅,但嬲都只係嬲一陣,佢係親生爸爸,我會由一對仔女同佢哋見面。仔女都有去北京搵過爸爸住過一段時間,坦白講,佢哋爸爸年紀唔細,兩個仔女再唔盡子女責任嘅話,就會好對唔住佢。」的確,一段關係的結束不等於一定要交惡,再見亦是朋友,為了一對子女著想,雪梨也放下往事,繼續開心好好地享受單身生活。




徐少強隱瞞已婚身份,令雪梨無名無份跟了他7年,並誕生一子一女。(網上圖片)




可惜關係不再,在囡囡Erica出世後一年,兩人宣布分手。(網上圖片)




Erica和哥哥徐偉棟感情要好。(網上圖片)






https://skypost.ulifestyle.com.hk/article/2344823/雪梨演李莫愁成經典%20烈女個性嚇怕追求者:「冇人夠膽承認」

本帖子中包含更多资源

您需要 登录 才可以下载或查看,没有帐号?注册 Register

x
您需要登录后才可以回帖 登录 | 注册 Register

本版积分规则

Archiver|手机版|米米家族 - 米雪国际影迷网

GMT+8, 2020-4-1 00:25 , Processed in 0.069027 second(s), 23 queries .

Powered by Discuz! X3.4

© 2008-2017 MichelleClan.com

快速回复 返回顶部 返回列表